BUTUAN CITY- Mag-atubang og kaso ang usa ka drayber nga misukol ug makita sa mikatap nga video nga misulay pagligis sa usa ka traffic enforcer sa City Transportation and Traffic Management Department (CTTMD) atol sa gipahigayong enforcement operation sa dakbayan sa Butuan.
Ang CTTMD, inabagan sa City Legal Department, pormal nang nag andam sa pagpasaka og bug-at nga mga kaso batok sa drayber. Kini naglakip sa paglapas sa Article 151 sa Revised Penal Code o Resistance and disobedience to a Person in Authority or the Agent of such Person og Attempted Homicide.
Subay sa initial nga panukiduki, ang insidente namatikdan sa CTTMD enforcer, nga ang maong drayber illegal nga mipahigayon sa pag u-turn sa J.C. Aquino Avenue. Sa dihang giduol aron isyuhan og citation ticket, nagdumili ang drayber sa paghatag sa iyang lisensya ug mibalibad sa ticket. Ug wala damhang kalit niining gi-atras ang truck nga gidrayban ug gipadagan kini tumong sa enforcer, hinungdan nga napugos sa pagkapyot ug pagsakay sa bumper sa sakyanan ang enforcer aron dili kini maligsan.
Sa pikas nga bahin nasikop ang maong drayber pinaagi sa gikasang hot pursuit operation, sa mga personahe sa Butuan City Police Office Station 1, bandang 6:37 sa gabii, Hulyo 8, 2025, sa JC Aquino Avenue Butuan City.
Samtang sa pagkakaron ang maong drayber anaa na sa buhatan sa Butuan City Police Office Station 1 ug gipa-ilawom kini sa inquest proceedings aron pormal na nga masang-at ang tukmang kaso batok kaniya.
