𝐔𝐒𝐀 𝐊𝐀 𝐍𝐏𝐀 𝐏𝐀𝐓𝐀𝐘, 𝐃𝐔𝐇𝐀 𝐊𝐀 𝐇𝐈𝐆𝐇-𝐏𝐎𝐖𝐄𝐑𝐄𝐃 𝐅𝐈𝐑𝐄𝐀𝐑𝐌𝐒 𝐍𝐀𝐑𝐄𝐊𝐎𝐁𝐄𝐑

BUTUAN CITY- Patay ang usa ka miyembro sa New People’s Army (NPA) samtang duha ka high-powered firearms ang narekober sa duha ka managlahing engkuwentro nga nahitabo sa kabukiran sa Sitio Banbanon, Barangay Pianing, Butuan City niadtong Hulyo 7, 2025.

Ang maong mga engkuwentro gipasiugdahan sa mga tropa sa 29th Infantry Battalion ubos sa 901st Infantry Brigade, 4th Infantry Division, human madawat ang impormasyon gikan sa mga residente kabahin sa presensya sa mga armadong kalalakin-an nga nangilkil ug naningkamot sa pagrekrut sa komunidad.

Ang unang engkuwentro nahitabo sa alas 5:20 sa buntag, nga milungtad og duha ka minutos ug misangpot sa pagkarekober sa usa ka M16 rifle. Human sa panagsangka, ang mga nahibiling rebelde misibat sa wala matinong direksyon.

Sa pagka bandang alas 7:30 sa buntag sa samang adlaw, laing engkuwentro ang nahitabo atol sa padayon nga pursuit operation, nga midugay og lima ka minutos ug misangpot sa pagkamatay sa usa ka wala pa mailhing miyembro sa NPA, ug sa pagkarekober sa usa ka R4 rifle.

Samtang, sa pahayag ni Lt. Col. Mark S. Tabon, Commanding Officer sa 29IB, iyang giila ang kooperasyon sa komunidad isip yawe sa kalampusan sa operasyon.