Patay ang usa ka tuig ug 5 ka bulan nga bata human malumos sa irrigation canal sa Purok Baras 2, Barangay M. Roxas, Sto. Niño, South Cotabato, kagahapon sa buntag, Nobyembre 19, 2026. Giila ang biktima nga alyas Baby Franz, residente sa maong lugar.
Base sa inisyal nga imbestigasyon sa Sto. Niño Municipal Police Station, aksidenteng nahulog ang bata sa irrigation canal human misunod sa iyang iyaan nga padulong unta sa umahan.
Nakita ang bata nga nalumos sa kanal, mga 15 metros ang gilay-on gikan sa ilang pinuy-anan, pasado alas-8:40 sa buntag. Giluwas dayon ang bata ug gidala sa Clinica Luntao Incorporated alang sa medikal nga pag-atiman, apan gideklarang patay alas-8:44 sa buntag.
Gikumpirma usab sa Municipal Health Officer nga pagkalumos ang hinungdan sa pagkamatay sa bata human sa post-mortem examination. Ang mga patayng lawas sa biktima anaa na karon sa Collado Funeral Homes sa maong lungsod.










