Tulo ka reklamo kalabot sa bullying ang nadawat sa Malungon Municipal Police Station sa probinsya sa Sarangani pinaagi sa programang Speak-Up Box gikan Nobyembre 9-13 , 2026 sa Philippine National Police.
Base sa report sa Police Regional Office 12, ang maong mga reklamo giatiman pinaagi sa pakigtambayayong sa mga magtutudlo sa hingtungdang mga eskwelahan aron ipahigayon ang imbestigasyon.
Ang Speak-Up Box usa ka inisyatibo nga nagtumong sa paghatag og luwas ug sayon nga paagi alang sa mga estudyante nga makapadayag sa ilang mga kabalaka, reklamo ug mga problema pinaagi sa pagsulat. Pinaagi niini, gihatagan og kahigayonan ang mga estudyante nga makareport sa mga insidente sama sa bullying ug uban pang mga butang nga mahimong makadaot sa ilang kaluwasan ug kaayohan sulod sa eskwelahan.
Tumong usab sa maong programa nga mapalig-on ang koordinasyon tali sa kapulisan, eskwelahan ug komunidad aron masiguro ang kaluwasan sa mga estudyante.










