Nadakpan ang usa ka hamtong nga lalaki atol sa gipahigayong buy-bust operation sa kapulisan sa alas 6:50 sa Barangay Guinoman, lungsod sa Diplahan, Zamboanga Sibugay niaging adlaw.
Ang operasyon gipahigayon sa Special Drug Enforcement Team o SDET sa Diplahan Municipal Police Station, nga miresulta sa pagkadakop sa suspek nga giila lamang sa kapulisan pinaagi sa iyang mga inisyal nga SLI, usa ka residente sa maong barangay.
Nakuha gikan sa suspek ang usa ka heat-sealed transparent plastic sachet nga adunay puti nga kristal nga substansiya nga gituohang shabu, nga may gibug-aton nga mokabat sa usa ka gramo ug gibanabanang kantidad nga 6,800 pesos. Nakumpiskar usab ang pipila ka drug paraphernalia, lakip ang glass pipe tooter, digital weighing scale, aluminum foil ug cellphone, lakip na ang gigamit nga buy-bust money.
Gipahigayon ang pagmarka ug imbentaryo sa mga nakumpiskar nga ebidensiya diha sa presensya sa usa ka opisyal sa Barangay Guinoman ug representante sa media. Gidala ang nadakpang suspek sa Diplahan Municipal Police Station alang sa dokumentasyon ug hustong disposisyon, samtang ang nakumpiskar nga gidudahang ilegal nga droga ipadala sa Zamboanga Sibugay Forensic Unit alang sa quantitative ug qualitative examination.










