Gisugdan na ang unang batch sa tulo ka adlaw nga Refresher Course on Standard First Aid and Basic Life Support niadtong Nobyembre 11 hangtod 13, 2026, sa 602nd Brigade, Poblacion, Carmen, Cotabato. Miapil sa maong pagbansay ang mga miyembro sa Cotabato Province Emergency Response Team o CPERT, Incident Response Team o IRT, ug Disaster Risk Reduction and Management Focal Persons.
Kabahin kini sa programa nga “Kaalaman, Susi ng Kahandaan” ubos sa pagpangulo ni Governor Emmylou “Lala” J. Taliño-Mendoza. Tumong sa maong kalihokan nga mapalambo ang kahibalo ug kahanas sa mga responder sa paghatag og first aid ug basic life support, ilabina sa panahon sa emerhensiya ug kalamidad.
Gitinguha usab niini nga mas mapadali ug mapauswag ang ilang pagtubag sa mga insidente, subay sa bag-ong mga sumbanan ug giya sa Department of Health o DOH. Pinaagi niini, gilauman nga mas maandam ang mga response team sa paghatag og tukma ug epektibong tabang aron maluwas ang kinabuhi sa panahon sa emerhensiya.
Photo courtesy: Provincial Government of Cotabato










