Gipahigayon sa Gender and Development Focal Point System o GFPS sa lokal nga panggamhanan sa Ipil ang monitoring ug inspeksyon sa nagkalain-laing proyekto nga gipondohan ubos sa 2026 Gender and Development o GAD Budget , kauban ang mga opisina nga responsable sa pagpatuman niini.
Lakip sa mga proyekto nga giinspeksyon mao ang Indigenous Peoples Multipurpose Building nga nagkantidad og kapin usa ka milyon nga gitumong nga mahimong lugar alang sa mga tigom, koordinasyon ug nagkalain-laing kalihokan sa komunidad sa mga lumad.
Gi-monitor usab ang pag-instalar sa solar street lights gikan sa Barangay Ipil Heights padulong sa Barangay Suclema nga nagkantidad og 3 milyon pesos. Gilauman nga pinaagi niini, mas hayag ug luwas ang dalan alang sa mga molupyo ug motorista, ilabi na panahon sa kagabhion.
Apil usab sa gisusi ang operationalization sa Women and Children Center sa Barangay Tiayon nga adunay pondo nga 1 milyon 860 mil pesos. Kini nga pondo gitumong sa pagsuporta sa mga galastohan ug panginahanglan sa operasyon aron mapadayon ang paghatag og mga serbisyo ug programa alang sa kababayen-an.
Samtang, gipahinumdoman nga ubos sa Magna Carta of Women o Republic Act 9710, ang mga lokal nga panggamhanan kinahanglan maggahin og labing menos lima ka porsyento sa ilang tinuig nga budget alang sa mga programa ug proyekto nga may kalabotan sa Gender and Development.
Pinaagi sa maong monitoring, tumong sa LGU Ipil nga masiguro nga ang matag proyekto nag-uswag sumala sa plano, husto ang paggamit sa pondo ug adunay konkretong kaayohan nga mahatag sa komunidad.










