Gipasiugda ang padayon nga paningkamot alang sa pagpalambo sa sektor sa edukasyon sa probinsya sa Zamboanga Sibugay pinaagi sa gisugyot nga pagtukod sa Mindanao State University – Zamboanga Sibugay College of Medicine.
Kini human gitambongan ang deliberasyon sa Committee on Higher and Technical Education kalabot sa House Bill Number 7071, nga nagtumong sa pagtukod sa maong kolehiyo sa medisina ubos sa Mindanao State University sa Zamboanga Sibugay.
Gawas niini, gipahigayon usab ang usa ka produktibong panagtagbo uban kang Mindanao State University-Zamboanga Sibugay Chancellor Sheila Magolama aron hisgutan ang mga oportunidad sa kooperasyon ug mga lakang nga makatabang sa pagpalig-on sa access sa dekalidad nga edukasyon sa probinsya.
Sumala sa nagpasiugda niini, importante nga adunay mas daghang oportunidad ang mga kabatan-onan nga makatuon sa medisina sulod mismo sa ilang probinsya, aron dili na kinahanglan nga moadto pa sa layo nga mga lugar alang sa maong kurso.
Gilauman usab nga pinaagi niini, mas daghang umaabot nga doktor ang mamahimong kabahin sa paghatag og dekalidad nga serbisyo panglawas ngadto sa katawhan, ilabi na sa Distrito Dos ug sa tibuok Zamboanga Sibugay.
Tumong niini nga mapadaghan ang mga medical professionals ug mapaduol ang kalidad nga serbisyo medikal sa matag komunidad.










