Patay ang 91-anyos nga si Edelberta Pasuit ug ang iyang 26-anyos nga apo nga si Christian Pasuit human sa panagbingkil tungod sa kwarta sa Sitio Balangigan, Barangay Guinpaan, Moises Padilla, Negros Occidental, mga alas-5:30 sa kaadlawon niadtong Sabado, Oktubre 17, 2026.
Samtang, naangol ang 84-anyos nga lolo nga si Carlos Pasuit human niya dungaba ang apo aron panalipdan ang iyang asawa. Base sa inisyal nga imbestigasyon sa Moises Padilla Municipal Police Station, nangayo og kwarta si Christian sa iyang lola apan wala kini tagai, hinungdan nga naglalis sila hangtod giingong gitigbas sa batan-ong lalaki ang iyang lola gamit ang binangon.
Nakaangkon og grabeng samad sa ulo ug ubang bahin sa lawas si Edelberta nga maoy hinungdan sa iyang pagkamatay. Sa pagkakita sa bana sa nahitabo sa iyang asawa, mikuha usab og hait nga hinagiban si Carlos ug gidungab ang iyang apo. Bisan pa niini, nakabalos pa si Christian ug gitigbas usab ang iyang lolo, hinungdan nga nasamdan kini sa kilid sa ulo ug tuo nga kamot.
Sumala sa report, patay na ang lola ug apo human maangkon ang ilang mga samad, samtang gidala sa ospital si Carlos ug padayon nga gitambalan. Padayon ang imbestigasyon sa kapulisan aron matino ang tanang sirkumstansya nga mitumaw sa maong insidente.
Photo courtesy: MOISES PADILLA MPS
