Nasikop na sa kapulisan ang duha ka suspetsado sa pagpamusil sa Barangay Buenavista, Santa Catalina, Negros Oriental, nga miresulta sa pagkamatay sa duha ka tawo ug pagkasamad sa usa pa, niadtong Oktubre 16, 2026.
Sumala sa Police Regional Office–Negros Island Region (PRO-NIR), nadakpan ang mga suspetsado nga giila sa alyas nga “Jos” ug “Wil” human sa sunod-sunod nga hot pursuit operations.
Nasikop si alyas “Jos” alas-2:16 sa hapon sa Sitio Palali, Barangay San Isidro, Pamplona, samtang si alyas “Wil” misurender alas-10:54 sa gabii sa pinuy-anan ni Barangay Captain Enarciso Delazerna Jr. sa Barangay Buenavista, Santa Catalina.
Gipadayag sa mga imbestigador nga posibleng may kalabotan sa panaglalis sa utlanan sa yuta ug pag-ani sa lubi ang motibo sa pagpamusil. Apan, padayon pa kining gipamatud-an sa kapulisan.
Positibong giila sa naluwas nga biktima ang duha ka suspetsado.
Gimandoan ni PRO-NIR Regional Director PBGEN Rudecindo Reales ang mga hingtungdang yunit nga palig-onon ang imbestigasyon ug susihon ang tanang kasaligan nga impormasyon.
Gipasalig sa PRO-NIR nga ipadayon ang patas ug subay sa balaod nga imbestigasyon aron matino ang tibuok panghitabo ug mapanubag ang mga responsable.
Photo courtesy: NegOr Newsbite Today
