Giimbestigahan sa kapulisan ang insidente sa pagpanghulga nga naglambigit sa usa ka menor de edad nga ningkaylap sa social media.
Sa opisyal nga pahayag sa Surigao Component City Police Station, giimbitar na ngadto sa ilang buhatan ang menor de edad, kauban ang iyang mga ginikanan, pinaagi sa Women and Children Protection Desk o WCPD alang sa tukmang imbestigasyon sa maong insidente.
Girefer na usab ang maong kaso ngadto sa City Social Welfare and Development Office o CSWDO aron mahatagan og angay nga counseling ug interbensyon ang mga nalambigit.
Dugang pa sa kapulisan, makigkoordinar sila sa administrasyon sa eskwelahan aron matubag ang maong insidente ug masiguro ang kaluwasan ug kaayohan sa tanang nalambigit.
Gipasiugda usab sa Surigao Component City Police Station ang ilang pasalig sa pagpanalipod sa komunidad, ilabina sa mga bata, ug sa pagsunod sa hustong mga pamaagi sa pagdumala sa mga kaso nga naglambigit sa mga menor de edad.
Samtang, giawhag sa kapulisan ang mga ginikanan ug mga magtutudlo nga kon adunay susamang insidente, ipahibalo dayon kini sa kapulisan aron matubag sa tukmang paagi.
Gipahinumdoman usab ang publiko nga likayan ang pagpakaylap sa mga ngalan, hulagway, o ubang detalye nga mahimong makaila sa menor de edad nga nalambigit, samtang nagpadayon ang imbestigasyon.
Photo courtesy: Surigao Mps
