Nahugyaw sa katawa ang mga nanambong sa Municipal Gymnasium sa Baungon, Bukidnon niadtong Miyerkules, Oktubre 14, 2026 human milakbit sa paghisgot bahin sa mga balde si Bise Presidente Sara Duterte atol sa pagsaulog sa ika-70 nga Araw ng Lungsod.
Sa iyang pakigpulong, nagpagawas og pahimangno ang Bise Presidente kabahin sa posibleng epekto sa Super El Niño, partikular na ang hulaw ug kakulang sa tubig nga dakog epekto sa mga mag-uuma ug sa suplay sa pagkaon.
Gipasidan-an ni Duterte nga kung mokunhod ang ani tungod sa pagkauga sa yuta, mosaka ang presyo sa mga palaliton, ug gihisgutan niya nga dili igo ang simpleng pag-andam og balde kon walay konkretong plano ang gobyerno.
Gipasigarbo usab niya ang importansya sa tubig dili lang sa agrikultura kundi apil na sa pagsuplay og kuryente, diin gihimo niyang ehemplo ang paggamit sa aircon ug miingong “Muabot ta sa aircon ron ma’am ha kay daghan nama’g mga balde,” nga maoy naghatag og kalingawan ug nakapakatawa sa tibuok panon sa mga lumulupyo sa Baungon.
Photo courtesy: LGU Baungon/BUKPPO
