Gipasidunggan ang munisipyo sa Ipil ug ang Ipil Primary Care HIV Care Facility o AMOMA sa Rural Health Unit (RHU) Ipil human makadawat og mga pasidungog atol sa unang Regional HIV Treatment Hub Conference nga gipahigayon sa Department of Health – Center for Health Development Zamboanga Peninsula.
Nadawat sa munisipyo sa Ipil ang Top Performing LGU on HIV Testing Accomplishment Award, samtang gihatagan usab ang AMOMA sa HIV Advocacy Excellence and Impact Award, isip pag-ila sa ilang mga paningkamot sa pagpalig-on sa HIV testing, pagpahibalo sa publiko ug pagpalapad sa mga serbisyong may kalabotan sa HIV.
Pinaagi sa maong mga programa, padayon nga gipalapdan sa lokal nga pangagamhanan ug sa RHU Ipil ang kahigayonan sa mga residente nga maka-avail sa HIV testing, makadawat og tukmang impormasyon bahin sa paglikay ug pagtambal, ug makapangayo og serbisyo panglawas nga luwas ug kompidensyal.
Gipasiugda usab ang kamahinungdanon sa pagpakaylap sa hustong kahibalo bahin sa HIV ug sa paglikay sa diskriminasyon batok sa mga tawo nga apektado niini. Gipasalamatan ang mga health worker ug mga kauban sa programa nga nagpadayon sa paghatag og serbisyo aron mapanalipdan ang panglawas ug kaayohan sa katawhan sa Ipil.
