Naangol ang Duha ka indibidwal human milahos sa kanal ang ilang gisakyang motorsiklo sa kurbadahong bahin sa Cebu Transcentral Highway, Barangay Busay, Dakbayan sa Sugbo.
Sumala sa inisyal nga impormasyon, ang motorista nga giila sa alyas nga Kokoy, taga-Pardo, nagbiyahe uban sa iyang babayeng angkas kauban ang laing motorsiklo nga gimaneho ni alyas Arnel, nga may angkas usab nga taga-Urgello.
Nagkalahi ang pamahayag bahin sa dagan sa motorsiklo. Matud ni Kokoy, hinay ra ang ilang dagan samtang pauli gikan sa Sambag Uno, apan sumala sa laing motorista nga kasugat nila, kusog ang dagan niini ug mibangking sa kurbada hinungdan sa pagkatumba.
Gikataho usab nga nanggikan ang mga nalambigit sa pag-inom og makahubog nga ilimnon sa wala pa mobiyahe pauli.
Nagkatag sa kanal ang mga personal nga gamit sa mga biktima, lakip ang nabungkag nga iPhone ug pitaka, samtang grabeng nadaot ang nahiaguman sa motorsiklo. Daling mitubag ang Barangay Busay BPSO ug mitawag og rescue team aron matabangan ang mga naangol.
Photo courtesy: Web
