Gipamahayag ni Cebu Gov. Pamela Baricuatro ang iyang suporta sa pagpalambo sa industriya sa kawayan isip tinubdan sa panginabuhian, oportunidad sa negosyo, ug paagi sa pagpanalipod sa kinaiyahan ug pagpamenos sa epekto sa pagbag-o sa klima.
Matod sa gobernadora, ang pagpalapad sa maong industriya makatabang sa malungtarong produksyon, pag-abli sa bag-ong merkado, ug pagpalig-on sa koneksyon tali sa mga mag-uuma, tiggama, ug negosyante.
Gipamahayag kini atol sa Central Visayas Regional Bamboo Congress 2026 nga gipahigayon sa Social Hall sa Kapitolyo sa Sugbo kagahapong adlawa, Oktubre 15.
Gitambongan kini sa mga mag-uuma og kawayan, tiggama, ug negosyante gikan sa Sugbo ug Bohol. Lakip sa mga hisgotanan ang Bamboo and Carbon PH Project, malungtarong paggamit sa kawayan, ug ang papel niini sa pagsumpo sa pagbag-o sa klima.
Samtang, gihingusgan ni Department of Trade and Industry (DTI) 7 Acting Director Esperanza Melgar ang potensiyal sa kawayan sa paghimo og nagkalainlaing produkto, gikan sa tradisyonal nga mga hinimo sa kamot hangtod sa modernong materyales sa konstruksyon ug pagputos. Matod niya, gikinahanglan ang suporta sa matag yugto sa produksyon, gikan sa umahan hangtod sa merkado, aron mapalig-on ang kapasidad sa maong industriya.
Photo Courtesy: Cebu Province
