Nakarekord ang Police Regional Office 11 (PRO 11) og 25 ka operasyon batok sa ilegal nga droga sulod sa 24 oras, gikan alas 6:00 sa buntag niadtong Oktubre 14 hangtod alas 5:59 sa buntag Oktubre 15, 2026. Base sa datos sa kapulisan ning rehiyon, mikabat sa 28 ka tawo ang nadakpan atol sa maong mga operasyon.
Lakip sa mga nakumpiskang ilegal nga droga ang 306.19 grams nga gituohang shabu, pito ka punoan sa marijuana, ug 9.6 grams nga dahon sa marijuana. Sumala sa report, ang kinatibuk-ang kantidad sa mga nakumpiskang ilegal nga droga mikabat sa ₱2,084,644 base sa Standard Drug Price.
Gipangunahan ang maong mga operasyon ni Police Brigadier General Benigno L. Guzman, ang Acting Regional Director sa PRO 11, alang sa pagpalig-on sa kampanya sa kapulisan batok sa ilegal nga droga, isip kabahin sa ilang padayong paningkamot sa pagmintinar sa kalinaw ug kahapsay ning rehiyon.
Padayon usab ang PNP Region XI sa pagpahinumdom sa publiko nga makigtambayayong sa mga otoridad aron mapugngan ang paglapad sa ilegal nga droga ug mapanalipdan ang kaluwasan sa komunidad.
Photo Courtesy: PRO XI
