Gisugdan kagahapong adlawa, adlawng Miyerkules ang mga operasyon alang sa mga bata nga adunay depekto sukad pagkatawo ug uban pang panginahanglanon sa operasyon sa Cebu Provincial Hospital–Carcar City isip kabahin sa Cebu Pediatric Surgical Caravan 2026.
Mitambong sa unang adlaw sa kalihokan si Congresswoman Audrey Zubiri ug Alexandra “Lexi” Gatchalian, representante sa Senate Spouses Foundation Inc.
Ang maong programa hiniusang paningkamot sa Kagamhanan sa Probinsiya sa Sugbo, World Surgical Foundation Philippines ug uban pang kaabag aron mahatagan ang mga bata og access sa espesyal nga serbisyong medikal ug operasyon.
Matud ni Capitol Piso Health Consultant Dr. Nikki Baricuatro Catalan-Viscayno, dako ang ilang pasalamat sa mga medical team ug kaabag nga mitabang aron matuman ang maong kalihokan.
Lakip sa mga kondisyon nga operahan ang Hirschsprung’s disease, mga depekto sa puwerta sa pagpagawas sa hugaw, hydrocele, hernia, hypospadias, mga testicle nga wala mikunsad, lipoma ug uban pang bukol. Lakip usab sa mga giplanong operasyon ang pagtangtang sa colostomy.
Photo Courtesy: Cebu Province
