Nakasakmit ang Department of Veterinary Medicine and Fisheries (DVMF) og 1.25 ka kilo nga pagi sa Inayawan Public Market, tungod sa paglapas sa City Ordinance No. 2496.
Matud sa DVMF, gidili sa maong ordinansa ang pagbaligya sa mga endangered, threatened ug protected marine species, lakip na ang mga pagi, isip lakang sa pagpanalipod sa mga kahinguhaan sa dagat ug pagpreserbar sa balanse sa ecosystem.
Gipahimangnoan sa departamento ang mga magpapatigayon sa merkado nga likayan ang pagbaligya sa mga isda ug lamang-dagat nga gidili aron malikayan ang mga silot ubos sa kasamtangang mga balaod ug regulasyon.
Padayon usab ang regular nga pagmonitor ug inspeksiyon sa DVMF sa mga pampublikong merkado sa Dakbayan sa Sugbo aron masiguro ang pagsunod sa mga ordinansa ug mapalig-on ang pagpanalipod sa mga lamang-dagat ug kalikopan.
Photo Courtesy: Cebu City Government-Department of Veterinary Medicine and Fisheries
