Nakigdayalogo ang Lokal nga Panggamhanan sa Kapalong sa mga vendor sa public market niadtong Miyerkules, Oktubre 14, 2026, aron hisgutan ang plano sa pagtukod sa bag-ong merkado ug tubagon ang ilang mga pangutana ug kabalaka bahin sa posibleng epekto niini sa ilang panginabuhian.
Gipresentar ni Municipal Engineer Engr. Rey John Chavez ang plano sa bag-ong merkado nga nagtumong sa paghatag og mas lapad, organisado ug hapsay nga lugar alang sa mga namaligya ug mamalitay, lakip ang patas nga pagbahinbahin sa mga puwesto ug igong luna alang sa mga kustomer ug sakyanan.
Gipasabot usab ni Mayor Edgardo L. Timbol ang mga kahikayan alang sa temporaryong merkado samtang giandam ang pagtukod sa bag-ong pasilidad.
Gihisgutan usab ang pagbalhin sa tanang vendor, lakip ang mga namaligya sa gawas, ngadto sa sulod sa merkado aron mapalambo ang kahapsay sa operasyon ug patas nga oportunidad sa pagnegosyo.
Pinaagi sa maong dayalogo, gitinguha sa LGU Kapalong nga mapalig-on ang panag-uyon ug koordinasyon tali sa panggamhanan ug mga vendor alang sa pagtukod sa usa ka moderno, luwas ug organisadong public market nga makahatag og kaayohan sa mga namaligya, mamalitay ug katawhan sa lungsod.
Photo Courtesy: Kapalong InfoCenter
