Andam na ang mga mahigugmaon sa pagkaon sa tulo ka adlaw nga selebrasyon sa lokal nga lami ug talento sa pagluto pinaagi sa Kulinarya Piyesta 2026, nga ipahigayon sa Nobyembre 12 hangtod 14, 2026 sa Tagum City Trade and Exhibition Center sa Rotary Park.
Lakip sa mga dagkong kalihokan sa maong food festival ang nagkadaiyang kompetisyon nga magpakita sa talento sa mga lokal nga magluluto ug sa lami sa mga paboritong pagkaon sa mga Tagumenyo. Sa unang adlaw, Nobyembre 12, alas-1 sa hapon, ipahigayon ang “Pigrolac Pinaka Lami-Chon sa Tagum,” diin magtagbo ang mga eksperto sa paglechon aron ipakita ang ilang abilidad sa pag-andam og lami ug crispy nga lechon.
Sundan kini sa “Lechon with a Twist” sa alas-5 sa hapon, diin ipakita ang mga bag-o ug mamugnaong pamaagi sa pagluto ug pagpresentar sa tradisyonal nga lechon. Sa Nobyembre 13, alas-2 sa hapon, mag-atubangay ang mga koponan sa “Culinary Wars: Taste of Tagum,” usa ka paspasa nga kompetisyon sa pagluto nga magtimbang sa pagkamamugnaon, teknik ug kalidad sa lami sa ilang mga putahe.
Samtang sa kataposang adlaw, Nobyembre 14, alas-2 sa hapon, magkompetensiya ang mga barangay sa “Barangay Humba Challenge Competition,” diin ipakita sa matag komunidad ang ilang kaugalingong resipe ug pamaagi sa pag-andam sa humba.
Tumong sa kalihokan nga ipasiugda ang lokal nga pagkaon, talento sa mga magluluto ug mga tradisyon sa pagluto, samtang maghatag og higayon sa mga residente ug bisita nga malingaw sa nagkadaiyang putahe ug kalihokan.
Photo Courtesy: LGU-Tagum
