Nadakpan sa kapulisan ang usa ka 30 anyos nga lalaki sa buy-bust operation sa alas 3:48 sa kadlawon, Oktubre 16, 2026, sa Durian Street, Purok 2B, Barangay Taglatawan, Bayugan City, Agusan del Sur.
Giila ang dinakpan nga si alyas Roy-Roy, minyo, adunay duha ka anak ug residente sa Purok 1A, Barangay Taglatawan, Bayugan City.
Narekober gikan sa suspek ang tulo ka pakete sa gituohang shabu nga mitimbang og 1.45 gramos ug gibanabanang nagkantidad og ₱9,860 base sa standard market price.
Dugang sa ilegal nga droga, nakuha usab sa operasyon ang ₱100 nga kuwarta, usa ka cellphone, duha ka pinilo nga aluminum foil ug ₱500 nga gigamit isip buy-bust money.
Gipangulohan ang operasyon ni Deputy Chief of Police Police Major Kristopher Niel Nono, ubos sa pagdumala ni Police Lieutenant Colonel Joseph Carlo V. Silang, hepe sa Bayugan City Police Station.
Sa pagkakaron, anaa na sa kustodiya sa kapulisan ang dinakpan ug mag-atubang og kasong kalapasan sa Republic Act No. 9165 o Comprehensive Dangerous Drugs Act of 2002.
Photo courtesy: PNP Bayugan
