Nadakpan sa mga otoridad ang usa ka lalaki nga giila nga Top 19 Most Wanted Person sa Highway Patrol Group (HPG) sa Lansang Village, Barangay Sinawal, General Santos City, alas 11:30 sa buntag niadtong nakalabay nga adlaw.
Gipahigayon ang operasyon sa City Highway Patrol Team General Santos ug Regional Highway Patrol Unit 12, sa koordinasyon sa Police Station 2 sa General Santos City Police Office, Police Intelligence Team South Cotabato, ug Koronadal Police Station.
Ang suspek nadakpan pinasikad sa warrant of arrest tungod sa paglapas sa Republic Act 10883 o New Anti-Carnapping Act of 2016, nga giisyu sa Regional Trial Court Branch 284 sa Valenzuela City niadtong Marso 22, 2024.
Girekomendaran og piyansang P300,000 alang sa iyang temporaryong kagawasan. Human sa pagdakop, gidala ang suspek sa Dr. Jorge P. Royeca City Hospital alang sa medical examination sa wala pa siya gibutang sa kustodiya sa Police Station 2 alang sa tukmang disposisyon.
Matod ni PBGEN Joyce Patrick B. Sangalang, magpadayon ang HPG sa hiniusang operasyon batok sa mga wanted person, ilabina sa mga kaso nga may kalabotan sa carnapping, samtang gisiguro ang pagtahod sa hustong proseso ug katungod sa mga dinakpan.
Photo courtesy: Gensan HPG
