Nasakmit sa kapulisan ang 75 ka gagmayng armas ug 87 ka bala, samtang siyam ka sibilyan ang gidakop sa One-Day Simultaneous Anti-Criminality Law Enforcement Operation o SACLEO sa Police Regional Office 12 niadtong nakalabay nga adlaw.
Gipahigayon ang 74 ka operasyon sa nagkadaiyang bahin sa rehiyon, lakip na ang pagpatuman sa search warrant, Oplan Katok, Bilang Boga, checkpoint operations, ug pagserbisyo sa warrant of arrest.
Dugang niini, lima pa ka suspek ang nagpabiling wala madakpi. Ang Cotabato Police Provincial Office maoy nakatala sa pinakadaghang operasyon ug nasamsam nga armas, samtang ang General Santos City Police Office maoy nakarekober sa pinakadaghang bala nga mikabat sa 25 ka rounds.
Matud ni PRO-12 Regional Director PBGEN Alan B. Manibog, padayon nilang palig-onon ang kampanya batok sa mga loose firearms aron mapugngan ang paggamit sa mga armas sa krimen ug mapanalipdan ang kaluwasan sa publiko.
Gihangyo usab niya ang katawhan nga makigtambayayong sa kapulisan ug mosunod sa balaod kalabot sa pagpanag-iya ug pagtipig sa mga armas.
Photo courtesy: PRO 12
