Angol ang usa ka tindero og malunggay pandesal human mabangga ang iyang gimanehong motorsiklo nga adunay sidecar sa usa ka payong-payong sa may alas 6:21 sa gabii niadtong nakalabay nga adlaw, sa Purok 7, Barangay Butadon, Kapatagan, Lanao del Norte.
Giila ang biktima nga Haillrhiz Uhranhaih Madayad Lumagda, residente sa Purok 3, Barangay Abaga, Lala, sakop sa maong probinsya.
Subay sa report, niadtong tungora nagmaneho ang biktima sa itom nga Bajaj 125 motorcycle ang nga adunay sidecar, nga may plakang K4502P, gikan sa SND padulong sa ilang pinuy-anan human mamaligya og malunggay pandesal. Nasayran, nga nabangga ang iyang sidecar sa usa ka payong-payong nga giingong walay nakasiga nga headlight ug signal light niadtong panahona.
Sumala usab sa mga tawo nga nakasaksi sa hitabo, naigo ang biktima sa kahon nga gisudlan sa iyang mga paninda atol sa disgrasya. Isip resulta sa insidente, nakahiagom og sakit iyang tuo nga bukton ug tuo nga bitiis ang biktima nga daling gihatagan sa tabang sa emergency response team sa MDRRMO Kapatagan.
Sa pagkakaron, padayon pa ang imbestigasyon sa maong insidente.
Photo Courtesy: MDRRMO Kapatagan
