Arestado ang usa ka lalaki nga namaligya sa drogang shabu sa hiniusang pwersa sa kapulisan sa pagpanguna sa Tubod Municipal Police Station (MPS), kauban ang Provincial Drug Enforcement Unit (PDEU) sa Lanao del Norte Police Provincial Office (LDN PPO) ug Philippine Drug Enforcement Agency Regional Office 10 (PDEA RO 10) – Lanao del Norte sa may alas 12:20 sa udto niadtong Oktubre 11, 2026 sa Purok 1A, Barangay Dalama, Tubod, Lanao del Norte.
Giila ang suspek nga si alyas “Jose” 50 anyos, minyo, residente sa Purok 1A, Barangay Dalama, Tubod, ug giila isip Street-Level Individual (SLI). Subay sa report, nga atol sa operasyon, nasakmit ang upat ka pakete sa gituohang shabu nga nitimbang sa 1.25 gramo nga nagkantidad sa 8,500.
Narekober usab sa mga otoridad ang usa ka walay sulod nga transparent plastic sachet, usa ka ₱500 nga papel nga kuwarta nga gigamit isip buy-bust money, ₱227 nga cash sa nagkalainlaing denominasyon, usa ka asul nga disposable lighter, usa ka pakete sa sigarilyong Green Canon Menthol, ug usa ka army-green nga pitaka para sa sensilyo.
Ang mga nasakmit nga gidudahang ilegal nga droga gidala ngadto sa Lanao del Norte Provincial Forensic Unit alang sa qualitative ug quantitative samtang ang suspek anaa na sa kustodiya sa Tubod MPS alang sa dokumentasyon ug hustong disposisyon.
Sa pagkakaron, giandam na ang mga kasong paglapas sa Sections 5 ug 11, Article II sa Republic Act No. 9165, o Comprehensive Dangerous Drugs Act of 2002, batok sa suspek.
Photo Courtesy: PNP Lanao del Norte
