Nagpasidaan ang Traffic Enforcement Unit (TEU) sa General Santos City Police Office ngadto sa mga drayber sa traysikel nga magpakita og pagtahod, pagpailub ug maayong pamatasan sa ilang mga pasahero.
Sa pahimangno sa TEU, dili angay tugotan sa kadalanan ang pagpamulong og bastos, dili maayong pagtratar, pagpanghasi ug uban pang dili angay nga pamatasan sa mga drayber batok sa ilang mga pasahero. Gidasig usab sa TEU ang mga pasahero nga makasinati og ingon niini nga insidente nga mokuha og klarong litrato sa traysikel ug sa plaka niini.
Gikinahanglan usab nga hinumdoman ang petsa, oras ug lugar sa insidente aron matabangan ang mga otoridad sa pag-ila sa drayber ug sa maong sakyanan.
Mahimo nga ireport ang maong insidente ngadto sa hustong mga otoridad o pinaagi sa TEU hotline nga 0975-749-0019. Tumong sa maong pahimangno nga mapalambo ang disiplina, maayong pamatasan ug kaluwasan sa mga pasahero sa pampublikong transportasyon sa dakbayan sa General Santos.
