Patay ang usa ka 66 anyos nga lalaki human gibunalan og baseball bat sa ulo sa iyang silingan sa Purok Lower Puting Bato, Barangay Calumpang, General Santos City, alas 9:30 sa buntag, niadtong oktobre 12, 2026. Giila ang biktima sa alyas JOMAR, samtang ang suspek mao si alyas JONATHAN, 31 anyos nga nagpuyo sa nahisgutang lugar.
Base sa inisyal nga imbestigasyon sa kapulisan, una nang naglalis ang pipila ka indibidwal sa maong lugar sa wala pa nahitabo ang pagpangbunal.
Sumala sa usa ka saksi, miabot ug miapil sa panaglalis ang suspek. Giingong nasumbagan kini sa biktima, hinungdan nga mipauli ang suspek ug mibalik nga adunay dala nga gituohang baseball bat.
Gibunalan sa suspek ang biktima sa ulo gamit ang maong butang, hinungdan nga nawadan dayon og panimuot ang edaran. Dali siyang gidala sa labing duol nga ospital alang sa medikal nga pagtagad. Apan, bisan pa sa pagdala kaniya sa tambalanan, na comatose og namatay ang biktima.
Human makadawat og tawag gikan sa asawa sa biktima, dali nga miresponde ang mga sakop sa kapulisan ug nangolekta og impormasyon kabahin sa insidente.
Alas 11:45 sa buntag, gidala sa Calumpang Police Station ang suspek, lakip ang narekober nga baseball bat, alang sa dugang nga imbestigasyon ug pag-andam sa tukmang kaso batok kaniya.
Padayon pang gituki sa kapulisan ang tibuok detalye sa insidente aron matino ang mga sirkumstansiya nga mitultol sa makamatay nga pagpangbunal sa biktima.
Photo courtesy:PP10
