Gipangandaman na karon sa nagkadaiyang ahensya sa kagamhanan ang posibleng mas bangis ug mas kusog nga hulaw human nagpagawas og pasidaan si Engr. Al Quiblat, ang regional chief sa PAGASA Visayas, kalabot sa nagkairog nga “Very Strong” El Niño karong tuiga hangtod sa 2027.
Matud ni Quiblat, lahi kini nga El Niño kaysa sa mga nangaging nasinati tungod sa kakusog sa dagan niini ug sa gitas-on sa epekto nga molungtad hangtod sa unang tunga sa bahin sa 2027.
Base sa labing uwahing Climate Outlook sa PAGASA, makasinati ang Sugbo ug uban pang bahin sa nasud og hilabihan nga ubos sa normal nga ulan sugod karong mosunod nga mga bulan.
Tungod sa maong phenomenon, nagpahibalo na daan si Quiblat nga dako ang kahigayonan nga makasinati og krisis sa tubig ug pagkaon tungod kay apektado niini ang mga dam, irigasyon, ug lebel sa groundwater.
Photo Courtesy: Altitude Philippines
