May iba’t ibang programa ang pamahalaan na nakalaan para sa mga dating miyembro ng ilegal na grupo na nagpasiyang sumuko at magbalik-loob sa gobyerno. Layunin ng mga programang ito na matulungan silang makapagsimula ng panibagong buhay, makabalik sa kanilang mga pamilya, at magkaroon ng maayos na kabuhayan. Kabilang sa mga tulong na maaaring matanggap ng mga kwalipikadong benepisyaryo ang mga programang pangkabuhayan o livelihood assistance na makatutulong upang magkaroon sila ng mapagkakakitaan.
Ito ang ibinahagi ng Public Information Office o PIO ng Cotabato City Police Office sa programang Ronda Opisina ng 102.1 Juander Radyo Cotabato. Ayon sa tanggapan, patuloy ang mga hakbang ng pamahalaan upang masuportahan ang mga dating miyembro ng mga ilegal na grupo na nagpasyang makipagtulungan sa gobyerno. Bukod sa tulong pangkabuhayan, may iba pang programa na naglalayong tulungan silang makabalik sa normal na pamumuhay at maging produktibong bahagi ng kanilang mga komunidad.
Samantala, mahalaga ang koordinasyon ng kapulisan at iba pang ahensya ng pamahalaan upang matiyak na maipararating sa mga kwalipikadong benepisyaryo ang mga tulong at serbisyong nakalaan para sa kanila. Inaasahang sa pamamagitan ng mga programang ito, magkakaroon sila ng mas maraming pagkakataong makapamuhay nang mapayapa kasama ang kanilang mga pamilya. Layunin din ng mga inisyatibang ito na makatulong sa pagpapanatili ng kapayapaan at kaayusan sa komunidad, habang binibigyan ng pagkakataon ang mga nagbalik-loob na magbago at magsimula ng bagong buhay.
