Nadakpan sa kapulisan ang usa ka 35-anyos nga lalaki atol sa gipahigayong drug buy-bust operation sa Special Drug Enforcement Team (SDET) sa Ipil Municipal Police Station, mga alas-11:55 sa gabii niadtong Oktubre 12, 2026, sa lungsod sa Ipil, Zamboanga Sibugay.
Ang dinakpan giila lamang pinaagi sa mga inisyal nga NSLI, usa ka ulitawo, negosyante ug residente sa Barangay Tiayon, Ipil Zambaonga Sibugay. Nasakmit gikan kaniya ang tulo ka heat-sealed transparent plastic sachet nga adunay puti nga kristal nga substansiya nga gituohang shabu, nga adunay gibana-banang gibug-aton nga 2.5 gramos ug standard drug price nga mokabat sa ₱17,000.
Narekober usab sa operasyon ang usa ka genuine ₱500 bill nga gigamit isip marked money,ug uban pang drug paraphernalia. Ang pagmarka ug pag-imbentaryo sa mga nasakmit nga ebidensiya gihimo atubangan sa usa ka opisyal sa Barangay Tiayon ug usa ka representante sa media.
Ang mga nasakmit nga gidudahang ilegal nga droga ipadala sa Zamboanga Sibugay Forensic Unit alang sa qualitative ug quantitative examination. Samtang ang dinakpan gidala sa Ipil Municipal Police Station alang sa tukmang dokumentasyon ug disposisyon. Nagpadayon ang kapulisan sa ilang kampanya batok sa ilegal nga droga sa probinsiya.
