Giluwas sa kapulisan ang 15 ka mga lalaking Chinese Nationals sa Barangay Tandiong Muslim, Munisipalidad sa Alicia, Zamboanga Sibugay, niadtong hapon sa Oktubre 12, 2026.
Sumala sa taho sa Zamboanga Sibugay Police Provincial Office (ZSBPPO), ala 1:00 sa hapon sa maong petsa sa dihang nagtawag sa Alicia Municipal Police Station ang Mayor sa lungsod aron ireport ang presensya sa mga Chinese Nationals sa maong lugar. Dihadiha, milihok ang mga personahe sa Alicia MPS, Provincial Intelligence Unit (PIU) sa ZSBPPO ug 1st Provincial Mobile Force Company (1st PMFC) aron susihon ang report.
Nakit-an ug giluwas sa mga otoridad ang 15 ka indibidwal nga nag-edad og 25 hangtod 51 anyos. Human niini, gidala sila sa Alicia Municipal Police Station alang sa dokumentasyon ug beripikasyon sa ilang mga pagkatawo ug kahimtang.
Gidala usab ang mga naluwas sa Alicia Rural Health Unit alang sa medical check-up sa wala pa sila itugyan ngadto sa Bureau of Immigration alang sa tukmang disposisyon. Wala maghatag og dugang detalye ang kapulisan bahin sa ilang presensya sa maong lugar samtang nagpadayon ang proseso sa beripikasyon.
