Nakadawat og mga token ang Juander Radyo Ipil gikan sa BJMP Ipil District Jail Male Dorm, nga personal nga gitunol nila SJO2 Luisa Dayrit ug JO2 Joy Alde. Ang maong mga token hinimo mismo sa mga Persons Deprived of Liberty o PDL isip kabahin sa ilang paningkamot nga makatabang sa mga personahe sa BJMP.
Dili lamang kini ordinaryong mga token, kondili usa ka simbolo sa pagtinabangay, pagpasalamat ug malasakit sa isigkatawo. Pinaagi sa ilang mga hinimo, gipakita sa mga PDL nga bisan anaa sila sa sulod sa pasilidad, aduna gihapon silay ikatampo aron makatabang sa panginahanglan sa uban.
Ang maong inisyatibo gitumong nga mahimong dugang nga tinubdan sa suporta alang sa mga personahe sa BJMP, ilabi na sa ilang mga pamilya. Pinaagi niini, adunay higayon nga ang mga PDL makatampo sa pagtabang aron adunay magamit o madugang sa panginahanglan sa pamilya sa mga personahe.
Alang sa Juander Radyo Ipil, ang maong pagdawat sa mga token usa ka pahinumdom nga ang tinuod nga pagtabang dili masukod sa kadak-on sa gihatag, kondili sa sinseridad sa katuyoan. Ang maong kalihokan nagpakita usab nga ang paglaom, pagkamamugnaon ug pagtinabangay mahimong magpadayon bisan asa, ug nga ang matag usa adunay kahigayonan nga mahimong kabahin sa usa ka maayong katuyoan.
