Nasakmit sa mga operatiba sa PDEA-7 ug Cebu City Police Station 7 ang upat ka kilo sa gituohang shabu nga nagkantidad og P27.2 milyon atol sa buy-bust operation sa Saint Jude Phase 2, Barangay Bulacao, Dakbayan sa Sugbo.
Nadakpan sa operasyon ang usa ka 33-anyos nga food vendor nga giilang alyas Joseph, residente sa Mohon, Talisay City, kauban ang duha ka mekaniko nga giilang alyas Eduardo, 24, ug alyas Harold, 25, nga taga-Pamplona, Negros Oriental.
Nasakmit ang lima ka vacuum-sealed pack sa gituohang shabu nga mitimbang og upat ka kilo, lakip ang buy-bust money, usa ka sedan, duha ka cellphone ug uban pang ebidensiya.
Base sa imbestigasyon, ang mga suspek gikataho nga makapamahig og walo ka kilo sa shabu matag semana sa Metro Cebu. Gikustodiya na sa PDEA-7 ang tulo ka suspek ug mag-atubang og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Photo Courtesy: PNP Cebu City Police Office
