Gipasiugda ang kamahinungdanon sa pagpangandam sa matag pamilya batok sa nagkalain-laing katalagman atol sa pagsaulog sa International Day for Disaster Risk Reduction o IDDRR niadtong milabay’ng adlaw.
Gidala sa selebrasyon ang temang “Resilience Starts at Home,” nga nagpasabot nga ang kalig-on ug kaluwasan sa komunidad magsugod sa kaugalingong panimalay.
Pinaagi sa hustong kahibalo, pagpangandam ug pagtinabangay sa mga sakop sa pamilya, mas mapamenos ang posibleng kadaot ug peligro nga dala sa mga kalamidad.
Kabahin usab sa kampanyang “Panatag na Tahanan at Paaralan” ubos sa Panatag Pilipinas 3.0 ang pagpalig-on sa kahandam sa mga estudyante, pamilya ug komunidad pinaagi sa mga materyales sa edukasyon ug mga video nga naghatag og giya sa pag-atubang sa nagkalain-laing peligro.
Giawhag ang publiko nga mag-andam og go bag ug emergency supplies, mailhan ang mga posibleng peligro sa ilang lugar, maghimo og family emergency plan, ug kanunay nga mosubay sa opisyal nga mga pahibalo ug early warning sa mga otoridad.
Gipahinumdoman usab ang tanan nga ang sayong pagpangandam makatabang sa pagpanalipod sa kinabuhi ug kabtangan, ilabina panahon sa kalamidad.
Photo Courtesy: CDRRMO Tagum
