APLIKASYON SA TULONG ESKWELA PROGRAM SA TAGUM CITY, GISUGDAN NA

Gisugdan na ang pagdawat sa mga aplikasyon alang sa Batch 3 sa Tulong Eskwela Program: Assistance for Licensure Examinees sa Tagum City, subay sa Executive Order No. 112, Series of 2026.

Pinaagi sa programa, ang mga kwalipikadong aplikante makadawat og lima ka libong pesos nga pinansyal nga tabang alang sa mga gastuhon sa ilang licensure examination nga ipahigayon gikan Oktubre hangtod Disyembre 2026.

Lakip sa mga kinahanglanon ang intent letter nga gi-address sa City Mayor, application form, bag-ong 2×2 ID picture, certificate of residency, certified true copy sa Transcript of Records alang sa board examination purposes, Notice of Admission gikan sa PRC, ug certificate of indigency ingon man kinahanglan ibutang ang tanang dokumento sulod sa usa ka long brown envelope.

Ang pagdawat sa aplikasyon molungtad hangtod Oktubre 21, 2026, ug ipatuman ang pag-apod-apod sa tabang pinaagi sa first-come, first-served basis.