Nadakpan sa kapulisan ang gikonsiderar nga No. 1 Regional Most Wanted Person sa Eastern Visayas nga giila lamang sa alyas nga “Dan,” 22 anyos ug residente sa ning dakbayan sa Ormoc, atol sa operasyon nga gilusad didto sa Barangay Dolores, Ormoc City, niadtong Oktubre 9, 2026. Isip kabahin sa gipakusog nga kampanya batok sa mga wanted person sa Police Regional Office 8 (PRO-8), ubos sa pagpangulo ni PBGen. Romano V. Cardiño.
Ang naasoy nga indibidwal gidakop sa mga personahe sa Ormoc City Police Station 5 (OCPS5) pinaagi sa warrant of arrest nga gipagawas niadtong Septiyembre 29, 2026, tungod sa duha ka ihap sa kasong rape, diin walay girekomendar nga piyansa alang sa maong mga kaso.
Human sa pagdakop, gidala ang suspek sa OCPS5 alang sa hustong dokumentasyon ug pagproseso sa mga papeles sa dili pa itugyan ngadto sa korte nga mipagawas sa warrant. Ang akusasyon batok kaniya pagahukman sa korte subay sa gitakdang proseso sa balaod.
