Nadakpan sa managlahing operasyon sa kapulisan ang Lima ka indibidwal, nga gilangkoban sa tulo ka Chinese nationals ug duha ka Pilipinang babaye, tungod sa giingong ilegal nga pagbaligya ug pag-apod-apod sa mga health products nga walay gikinahanglang awtorisasyon didto sa dakbayan sa Tacloban niadtong Huwebes, Oktubre 8, 2026.
Gipahigayon ang operasyon sa mga personahe sa Tacloban City Police Office–City Intelligence Unit ug Police Station 2, kauban ang Food and Drug Administration (FDA) ug Bureau of Customs (BOC), sa Barangay 40, P. Burgos Street, ug Barangay 13, Shopping Center nga misangpot sa pagkadakop sa tulo ka Chinese nationals nga giila lamang sa alyas nga “Wen,” 50 anyos; “Xin,” 26; ug “Ming,” 36, lakip ang duha ka Pilipinang babaye nga giila sa alyas nga “Sheng,” 21, ug “Jo,” 26, nga mga residente sa Tacloban City. Atol sa maong operasyon, nasakmit sa mga otoridad ang mga produkto nga gibanabanang mokabat sa ₱96,205 ang kantidad.
Giingong nalambigit sila sa paglapas sa Republic Act No. 9711 o Food and Drug Administration Act of 2009, nga nagkontrol sa paghimo, pag-import, pagbaligya, pag-apod-apod ug promosyon sa mga health products sa nasud. Gi-imbentaryo sa mga otoridad ang mga nasakmit nga produkto diha mismo sa lugar, uban ang presensya sa mga saksi ug pagsunod sa saktong legal nga pamaagi.
Matod ni Police Regional Office 8 Director Brig. Gen. Romano Cardiño, magpadayon ang kapulisan sa pakigtambayayong sa FDA, BOC ug uban pang may kalabotang ahensya aron mapugngan ang pagbaligya ug pag-apod-apod sa mga produkto nga walay awtorisasyon ug mapanalipdan ang mga konsumidor batok sa posibleng makadaot nga mga produkto.
Giawhag usab niya ang publiko nga mag-amping sa pagpalit sa mga health products ug ireport sa mga otoridad ang mga kadudahang kalihokan. Gipahinumdoman usab sa PRO-8 ang mga konsumidor nga susihon una kon adunay awtorisasyon sa FDA ang mga produkto, ilabina kadtong gibaligya sa mga dili awtorisadong tindero ug wala mapamatud-ang mga online seller.
Photo courtesy: PNP Tacloban City Police Office
