Gipaniguro sa National Irrigation Administration (NIA) Region 9 ang padayong pag-andar ug pag-operate sa mga solar irrigation projects nga gitugyan ngadto sa nagkalainlaing Irrigators’ Associations (IAs).
Matud ni NIA 9 Regional Manager Engr. June Nathaniel S. Plaza, bisan na naturn-over na ngadto sa mga IAs ang maong mga proyekto, wala nagpasabot nga pasagdaan na lang nila kini, gumikan kay nakamonitor sila sa tanang mga Solar Irrigation Projects.
Tumong niini nga masiguro ang padayong serbisyo sa mga pasilidad sa irigasyon aron makatabang sa mga mag-uuma, ilabina sa paghatag og igong suplay sa tubig alang sa ilang mga umahan ug mga tanom.
Pinaagi sa maong mga proyekto, gilauman nga mas mapadali ang pagpatubig sa mga umahan pinaagi sa paggamit sa solar energy o enerhiya gikan sa adlaw, nga maoy gigamit sa pagpadagan sa mga kagamitan sa irigasyon.
Gipunting usab niya ang kamahinungdanon sa hustong pagdumala ug regular nga pagmentinar sa mga pasilidad aron malikayan ang pagkadaot niini ug masiguro ang padayong paggamit sa mga benepisyaryong mag-uuma.
