Patay ang usa ka 33-anyos nga mag-uuma human siya gidunggab sa usa ka 26-anyos nga lalaki atol sa panag-away sa Barangay Poblacion B, Midsalip, Zamboanga del Sur, pasado alas 8 sa gabii niadtong Oktubre 11, 2026.
Base sa inisyal nga imbestigasyon sa kapulisan, nag-inom ang biktima ug ang suspetsado uban ang duha pa ka kauban sa usa ka panimalay mga alas sa gabii sa maong adlaw.
Apan nahitabo ang init nga panaglalis tali sa biktima ug sa suspetsado nga misangpot sa pagdunggab sa biktima gamit ang usa ka hunting knife nga miigo sa wala nga bahin sa iyang lawas.
Gidala una ang biktima sa Midsalip Rural Health Unit alang sa medikal nga pag-atiman ug wala nidugay gibalhin ra usab dayon sa Midsalip Infirmary Hospital, apan gideklara na siyang patay sa attending physician.
Samtang, nadakpan ra usab sa mga miespondeng pulis ang suspetsado nga gikatahong nagpabilin sa lugar human sa insidente diin nasakmit usab ang hunting knife nga giingong gigamit sa krimen.
Sa pagkakaron, anaa na sa kustodiya sa Midsalip Municipal Police Station ang suspetsado alang sa tukmang disposisyon ug pagpasaka sa angay nga kaso sa korte.
Photo courtesy:PIO ZSPPO
