Arestado ang usa ka 34 anyos nga lalaki nga driver sa kapulisan atol sa pagpatuman sa search warrant sa Purok 4, Barangay Upper Santo Niño, Mahayag, Zamboanga del Sur, mga alas 4:30 sa kaadlawon, Oktubre 10, 2026.
Bitbit sa Mahayag Municipal Police Station ang search warrant may kalabutan sa paglapas sa Sections 11 ug 12, Article 2 sa Republic Act 9165 o Comprehensive Dangerous Drugs Act of 2002, ug Republic Act 10591 o Comprehensive Firearms and Ammunition Regulation Act nga miresulta sa pagkasikop sa suspetsado nga nalistang Street Level Individual.
Nakuha atol sa operasyon ang tulo ka gagmayng gituohang shabu, usa ka improvised tooter, mga aluminum foil, usa ka plastic container, usa ka itom nga sling bag, usa ka kalibre .357 nga revolver, ug lima ka buhing bala niini.
Ang mga nakumpiskang mga ebidensiya ug ang dinakpan gidala sa Mahayag Municipal Police Station alang sa hustong proseso.
Ang ebidensiya nga gituohang ilegal nga droga ipresentar una sa korte nga nag-isyu sa search warrant sa dili pa itugyan ngadto sa Philippine Drug Enforcement Agency (PDEA) Region 9 sa Pagadian City alang sa laboratory examination.
Photo courtesy: The guardian
