Gipangandaman na sa National Irrigation Administration (NIA) 9 ang posibleng epekto sa La Niña phenomenon, ilabina sa kadaot nga mahimong dala sa kusog ug padayong pag-ulan sa mga pasilidad sa irigasyon sa Zamboanga Peninsula. Matud ni NIA-9 Regional Manager Engr. June Nathaniel S. Plaza, mas dako ang risgo nga madaot ang mga istruktura sa irigasyon panahon sa La Niña tungod sa posibleng pagbaha nga dala sa grabeng pag-ulan.
Gipasabot ni Plaza nga kabahin kini sa tibuok tuig nga pagpangandam ug pagpatuman sa ilang mga pamaagi aron mamenosan ang epekto sa mga kalamidad sa mga pasilidad sa irigasyon sa rehiyon.
Tungod niini, gipasiugda ang kamahinungdanon sa sayong pagpangandam ug tukmang pagplano aron malikayan ang dagkong kadaot sa mga pasilidad nga gisaligan sa mga mag-uuma.
Samtang padayon nga gibantayan ang posibleng pag-usab sa kahimtang sa panahon, nagtinguha ang NIA-9 nga mamenosan ang epekto sa La Niña sa irigasyon ug sa sektor sa agrikultura.
