Nasakmit sa hiniusang operasyon sa kapulisan ang kapin duha ka toneladang giingong sodium cyanide nga nagkantidad og ₱1.92 milyon sa Sitio Tampat, Barangay Tinoto, Maasim, Sarangani Province, niadtong nakalabay nga adlaw.
Sumala sa Police Regional Office 12, mikabat sa 2,035 ka kilo ang gibug-aton sa 32 ka sako sa giingong makahilong kemikal nga narekober sa palibot sa Tubong Beach Resort pasado alas 10:30 sa gabii.
Gipahigayon ang surveillance operation sa mga personahe sa RID 12 Team Alpha, Maasim Municipal Law Enforcement Team, PIU/SPPO ug RMU 12 human makadawat og impormasyon kabahin sa gikatahong pagpanag-iya ug pagbiyahe sa mga makahilo ug delikadong substansiya.
Gidala na sa Municipal Environment and Natural Resources Office o MENRO sa Maasim ang mga nasakmit nga kemikal alang sa hustong kustodiya ug disposisyon.
Samtang, gimando ni PRO 12 Regional Director PBGen Alan B. Manibog ang pagpahugot sa inspeksyon sa mga sakyanan nga moagi sa mga checkpoint, ilabina sa mga coastal area, aron mapugngan ang ilegal nga pagbiyahe sa maong mga delikadong substansiya.
Gipasidaan usab sa kapulisan nga mahimong makadaot sa mga lamang-dagat, ilabina sa mga coral reef ug isda sa Sarangani Bay, ang maong kemikal.Padayon ang koordinasyon sa kapulisan ug sa mga hingtungdang ahensiya kalabot sa insidente.
Photo courtesy: PRO 12
