Nakadawat og tig-P150,000 nga suporta ang unom ka batan-ong benepisyaryo sa unang batch sa Internship Program for Children of Coconut Farmers o IPCCF, aron makatukod ug makapalambo sa ilang kaugalingong coconut-based agri-business.
Ang maong pondo magsilbing puhunan sa mga benepisyaryo samtang mobalhin sila gikan sa internship ngadto sa pagdumala sa ilang kaugalingong panginabuhian. Kini usab makatabang kanila sa paggamit sa ilang nakat-onan ug kahanas sa programa aron makamugna og malungtarong tinubdan sa kita.
Diin ang mga benepisyaryo mao sila Stephen D. Suagan, Harvy D. Cabanas, Nicole S. Gonzales, Jhunfirson D. Bono, Renz Lloyd S. Latras, ug Jessa Mae G. Paglinawan.
Ang IPCCF gipatuman sa Agricultural Training Institute–Regional Training Center XI o ATI-RTC XI, uban sa Philippine Coconut Authority XI o PCA XI, aron maandam ang sunod nga henerasyon sa mga mag-uuma ug negosyanteng may kalabotan sa industriya sa lubi.
Ang programa naghatag og pagbansay, praktikal nga kasinatian ug oportunidad sa pagnegosyo. Pinaagi sa P150,000 nga suporta, gilauman nga mapadayon sa mga intern ang ilang mga plano gikan sa pagbansay ngadto sa aktuwal nga pagpatukod sa negosyo, nga makatabang sa ilang pamilya ug sa pagpalambo sa industriya sa lubi.
Photo Courtesy: ATI Davao Region
