Nasikop sa kapulisan ang usa ka 55-anyos nga lalaki nga giila sa alyas “Alan” atol sa search warrant operation sa Barangay Cuambogan, Tagum City, alas-9:05 sa buntag niadtong Oktubre 8, 2026.
Gipahigayon ang operasyon sa mga personnel sa Tagum City Police Station ug Davao del Norte Provincial Drug Enforcement Unit (DNPDEU), subay sa search warrant nga giisyu sa Vice Executive Judge sa Regional Trial Court (RTC) Branch 2, Region XI, Davao del Norte.
Narekober atol sa pagpangita ang upat ka heat-sealed transparent plastic sachet nga adunay sulod nga gituohang shabu, tulo ka bakanteng plastic sachet nga adunay salin sa gituohang ilegal nga droga, upat ka improvised glass tube tooter nga adunay salin usab, ug usa ka itom nga pouch.
Base sa Standard Drug Price, ang nakumpiskang gituohang shabu adunay gibanabanang timbang nga lima ka gramo ug kantidad nga mokabat sa P34,000.
Ang suspetsado, nga residente sa maong barangay, anaa karon sa kustodiya sa Tagum City Police Station ug posibleng mag-atubang og kasong paglapas sa Sections 11 ug 12, Article II sa Republic Act No. 9165 o Comprehensive Dangerous Drugs Act of 2002.
Nagpadayon ang proseso subay sa balaod samtang giatubang sa suspetsado ang mga alegasyon batok kaniya.
Photo Courtesy: TCPS
