Sikop sa mga personahe sa Bayugan City Police Station ang usa ka 36-anyos nga lalaki human kini nagpabuto og armas sa Purok 1B, Barangay Sta. Irene, Bayugan City, Agusan del Sur, karung adlawa, Oktubre 8, 2026.
Giila ang suspek sa alyas nga “Jimbo,” kinsa adunay live-in partner ug residente sa maong dapit. Nadakpan ang suspek pinaagi sa dinalian nga police response nga gipangulohan ni Police Lieutenant Roel P. Longaquit, ubos sa pagdumala ni Police Lieutenant Colonel Josef Carlo V. Silang, ang Chief of Police sa Bayugan City PNP.
Sumala sa taho sa kapolisan, mitubag ang mga otoridad sa tawag sa telepono gikan sa usa ka lungsoranon. Positibo nga giila sa mga saksi ang suspek nga nagpabuto og mubo nga matang sa armas ug daling midagan paingon sa iyang pinuy-anan.
Pag-abot sa responding team, naatlan pa ang suspek nga nagkupot sa armas. Apan sa dihang nabantayan niini ang mga polis, dali niyang gibutang ang armas sa likod sa kasilyas sa iyang silingan ug gitabonan kini og sako.
Narekober sa mga otoridad gikan sa dapit-nahitaboan ang usa ka Caliber .45 Pistol nga adunay serial number 462832, lakip ang usa ka magazine nga adunay sulod nga lima ka buhi nga bala.
Gipahibalo dayon ang suspek sa iyang mga katungod ubos sa konstitusyon sa wala pa kini hingpit nga gidala sa buhatan sa kapolisan. Kasong kalapasan sa Alarm and Scandal ug paglapas sa Republic Act 10591 o ang Comprehensive Firearms and Ammunition Regulation Act ang posibling ipasaka batok sa dinakpan.
Kasamtangan nga nagtingkagol na sa selda sa PNP Bayugan City ang suspek, samtang ang nakumpiska nga armas anaa na usab sa kustodiya sa maong buhatan alang sa tukmang disposisyon sa balaod.
Photo courtesy: PNP Bayugan
