Nagtala og lig-on nga pagtubo ang ekonomiya sa General Santos City niadtong 2025, nga miabot sa 8 porsyento, mas taas pa sa 6.9% nga natala niadtong 2024. Ang padayong pagpalig-on sa sektor sa serbisyo maoy nag-unang hinungdan sa maong kalampusan.
Base sa datos gikan sa Philippine Statistics Authority (PSA), ang kinatibuk-ang Gross City Domestic Product (GCDP) sa siyudad misaka ngadto sa ₱152.60 bilyon niadtong 2025, gikan sa ₱141.24 bilyon sa miaging tuig.
Sa matag sektor mao ang mga mosunod:Services Sector: mitubo og 5.3%, nagkontribwir og ₱101.34 bilyon — ang pinakadako sa tanan, Industry Sector: mitubo og 1.2%, nagkontribwir og ₱34.01 bilyon, Agriculture, Forestry and Fishing (AFF): mitubo og 1.5%, nagkontribwir og ₱17.24 bilyon
Gipakita sa datos nga nagpabiling dako ang natampo sa ekonomiya ang sektor sa serbisyo — ilabi na sa pamatigayon ug kalihokan nga may kalabotan sa serbisyo.
Tungod sa maong positibong pagtubo, gilauman nga mosunod usab ang dugang mga oportunidad alang sa negosyo, trabaho, ug panginabuhian sa mga lumulupyo sa General Santos.
