Arestado sa kapulisan ang usa ka construction worker human makuhaan og gituohang shabu atol sa checkpoint sa San Jose Road, Purok 16, Barangay Fatima, General Santos City, niadtong nakalabay nga adlaw.
Sumala sa kapulisan, gipahunong ang suspek tungod kay nagsakay kini og motorsiklo nga walay helmet. Apan imbes nga motuman, miikyas ang suspek ug mipadayon sa pagpadagan sa motorsiklo.
Gigukod kini sa mga kapulisan ug wala magdugay, naabtan ug na-corner siya sa mga otoridad. Sa pagkapkap, narekober gikan sa itom niyang pouch ang usa ka sachet sa gituohang shabu nga adunay gibug-aton nga 0.51 gramos ug gibanabanang kantidad nga kapin P3,000 pesos.
Wala usab siya makapakita sa hustong mga dokumento sa motorsiklo ug misukol ug namalikas sa mga otoridad atol sa pagdakop. Samtang apil usab ng gikumpiska sa kapulisan ang motorsiklo sa suspek.
Ginaandam na ang pagsaka og kaso batok kaniya tungod sa paglapas sa Article 151 sa Revised Penal Code ug Section 11, Article 2 sa Republic Act 9165 o Comprehensive Dangerous Drugs Act.
Sa kasamtangan nakakustodiya na kini sa Police Station 7 alang tukmang disposisyon.
