Arestado ang isa ka 45-anyos nga lalaki matapos makumpiskar sa iya ang 51.78 gramos sang ginapatihan nga shabu, isa ka pistola kag lima ka bala sa checkpoint operation sa Barangay Dansuli, Isulan, Sultan Kudarat, sang Biyernes sang gab-i, Oktubre 9, 2026.
Suno sa Isulan Municipal Police Station, nagapatigayon sang anti-criminality checkpoint ang mga pulis, upod ang Philippine Army, sang ginapatihan nga naglikaw sa inspeksyon ang suspek samtang nagasakay sa pula nga Ford Ranger. Naabtan ini matapos ang malip-ot nga paglagas sa isa ka dalan sa Purok 2, Barangay Dansuli.
Suno pa sa kapulisan, wala suno nagasunod ang suspek sa mga mando sang mga awtoridad kag naghatag sang pagpamahog, rason nga gin-aresto ini.
Sa ginpatigayon nga pagpangita, narekober ang isa ka sachet sang ginapatihan nga shabu nga may kabug-aton nga 51.78 gramos kag ginabulubanta nga nagabalor sang ₱352,104, isa ka Taurus TH9 pistol, lima ka bala nga kalibre 9mm, magazine, holster kag sling bag.
Ginapangatubang sang suspek ang mga kaso nga may kaangtanan sa Article 151 sang Revised Penal Code, Section 11 sang Republic Act 9165 ukon Comprehensive Dangerous Drugs Act of 2002, kag Section 31 sang Republic Act 10591 ukon Comprehensive Firearms and Ammunition Regulation Act.
