Komportable nga pagbiyahe ang gipaabot karon sa mga pasahero sa Santo Tomas-Davao route human miuyon ang Bachelor Express Inc. nga modugang og 13 ka bag-ong air-conditioned bus. Gilauman nga makatabang kini sa pagsulbad sa kakulang sa mga bus ug pagpaayo sa serbisyo sa pampublikong transportasyon sa maong ruta.
Nahimo ang kasabutan atol sa dayalogo tali sa mga opisyal sa lokal nga kagamhanan sa Santo Tomas, sa pagpanguna ni bise mayor Maria Luz Dejesica, ug sa mga representante sa bus company. Gawas sa bag-ong mga bus, misaad usab ang kompanya nga ayohon ug butangan og air-conditioning ang 12 ka kasamtangang bus sulod sa 45 ka adlaw.
Gitinguha nga makompleto ug magamit na ang mga bag-o ug giayo nga bus sa Disyembre 2026. Pinaagi niini, gilauman nga masulbad ang pipila ka problema sa transportasyon ug mas mapaayo ang kalidad sa biyahe alang sa mga pasahero nga kanunayng mobiyahe tali sa Davao ug Santo Tomas.
Subay sa pinaka-ulahing update nagsugod na sa pag-operate ang nahisgutang 12 ka mga bus sa nasangpit nga lungsod niadtong nakalabay nga adlaw lamang.
Photo Courtesy: Santo Tomas Information Official FB page
