Nag-una ang Valencia City Police Station sa mga operasyon batok sa ilegal nga droga ug sa pagdakop sa mga wanted person sulod sa tibuok bulan sa Setyembre 2026.
Gipahayag ni Chief of Police LtCol. Hope Mark Lacson Orbuda nga naangkon sa ilang istasyon ang Rank Top 1 sa Anti-Drug Operations ug Rank Top 3 sa kinatibuk-ang operational accomplishment batok sa mga wanted person. Pila sa ilang pinakadakong nahimo mao ang pagkasakmit sa mga ilegal nga droga nga nagkantidad og ₱800,000 base sa standard drug price, ug ang pagdakop sa pito ka mga nagtago-tago nga wanted person—lakip ang usa ka suspek gikan sa Batangas nga halos 20 ka tuig nang gipangita pinaagi sa koordinasyon sa kapolisan sa ubang rehiyon.
Gipatin-aw sa opisyal nga kadaghanan sa mga nadakpan sa droga mga lumulupyo sa Valencia, apan ang gigikanan sa maong mga substansya gawas na sa ilang Area of Responsibility (AOR).
Dugang ppa niini nga aron masiguro sab ang seguridad, padayon ang regular nga police visibility sa mga eskwelahan uban sa tabang sa mga barangay tanod ug Bantay Bayan, ubos usab sa suporta sa LGU ug buhatan sa Mayor alang sa pagpatuman sa curfew sa mga minor de edad ug pagkontrol sa pagbaligya ug pag-inom sa ilimnong makahubog sa pampublikong dapit.
Photo courtesy:Valencia City PNP/PRO-10
